У сярэдняй школе №32 г. Гродна адбылося незвычайнае свята нацыянальных культур «Беларусь сярод народаў», якое захапіла ўсіх прысутных сваёй самабытнасцю, непаўторным каларытам не толькі нашай краіны, але і іншых народаў свету. У мерапрыемстве бралі ўдзел вучні 1-5 класаў.Завочнае падарожжа пачалося са знаёмства з культурай, традыцыямі і звычаямі самых розных краін: Расіі, Японіі, Кітая, Вялікабрытаніі, Францыі, Грэцыі, Егіпта і, безумоўна, Беларусі. Госці свята змаглі пачаставацца традыцыйнымі стравамі, прыняць удзел у конкурсах, інтэрактыўных гульнях, больш грунтоўна пазнаёміцца з адметнасцю, непаўторнасцю кожнай краіны.
У беларускага паэта Генадзя Бураўкіна ёсць такія радкі:
Мы ўсім сваёй гасціннасцю вядомы,
Мы беларусы, мы народ такі….
У гэтым змаглі пераканацца ўсе госці свята, калі іх запрасілі да “беларускага стала”, які быў самым шчодрым і самым багатым. Самая ганаровая місія прадставіць сваю краіну была ўскладзена на вучняў беларускамоўных класаў.
Завяршылася свята вялікім гала-канцэртам. У актавай зале гучалі песні на самых розных мовах, зачароўвалі самабытныя танцы розных краін. Удзельнікі канцэрта як мага лепш стараліся паказаць культуру сваёй краіны.
Каб любіць Беларусь нашу мілую
Трэба ў розных краях пабываць…
Пазнаёміўшыся з культурамі самых розных краін свету, вучні і госці сярэдняй школы № 32 г.Гродна яшчэ раз пераканаліся, што культура роднай Беларусі займае пачэснае месца сярод іншых культур свету.